لما الفوضى بتزيد فى السوفت وير للأسف بيتسمى software rot او سوفت وير متعفن
وفى ناس تانيه بتسميه tech dept او دين متأخر و قال ايه فاكرين انهم هيدفعوه بعدين! ها ها ها ابقى قابلنى
و الفوضى دى ملهاش علاقه اذا كنت شغال مع تيم او لوحدك
طيب ايه السبب ؟
فى المدن فيه شوارع كويسه ونضيفه و فى شوارع مكسره و مبهدله
الأختلاف ده ليه طيب ؟
عشان الكونسبت الى هنفضل نتكلم عنه و هو one broken window او الشباك المكسور
الشباك المكسور الى اتساب ومتصلحش و شكله باين فى الشارع هيغرس فى عقول الناس الى فا الشارع ده شعور بال تعفن
و ده الى بيخلى بعدها فى شباك تانى بيتكسر و يبدأ يظهر بهدله فى الشارع و كتابه على الحيط
طيب الى حصل فوق ده فى عقول الناس ايه سببه ؟
علماء النفس بعد دراسات قالوا ان اليأس مٌعدى! عامل شبه دور البرد او بمناسبة الى احنا فيه نقدر نقول كورونا !
لما الشباك المكسور اتساب زى ماهو ومتصلحش خلى الناس تقتنع ان مفيش حاجه ممكن تتصلح و ان محدش مهتم و وأنها كده كده بايظه و السلبيه تبدأ تظهر وسط الناس
لو رجعنا بقى للسوفت وير هنلاقى ان الشباك المكسور ده ممكن يبقى ديزاين مش كويس او قرارات غلط بتاخدها وانت بتكتب كود او كود ال performance بتاعه ضعيف
عشان كده لازم لازم اول ما تلاقى broken window فى كود انت شغال عليه تصلحه !
هتقولى طب لو مفيش وقت ؟
يبقى على الأقل تحط comments تقول ان فى مشكله هنا لازم يترجعلها عشان لازم تاخد actions عشان تمنع ان مشاكل تانيه تظهر و عشان تبين انك متابع الدنيا كويس فى الكود بتاعك.
ممكن يجي فى بالك ان محدش عنده وقت انه يصلح كل المشاكل الموجوده فى الشارع ده وقتها عندك حل من اتنين يا تشتغل زبال "بما انها حاجه مناسبه للى انت عايش فيه" يا تسيب الشارع ده و تعزل منه اصلا.
فى قصه بسيطه بتقول ان كان فى حد عايش فى فيلا نضيفه جدا و فيها تحف غاليه المهم الفيلا دى حصل فيها حريقة كبيره جدا و اول ما بتوع المطافى جم وشافوا الفيلا قبل ما يدخلوا الفيلا بجزمهم و خراطيمهم المتبهدله فرشوا حصير من اول الباب لحد مكان الحريقة! فا الى هو انتوا بتعملوا ايه ! ايه اهم فى الموقف ده انكوا توقفوا الحريقة ولا انكوا تخافوا ان الفيلا تتبهدل! بس الفكره انهم هدوا للحظه و قدروا الموقف صح و كانوا واثقين انهم هيقدروا يحلوا المشكله و كان عندهم حرص ان مفيش حاجه من التحف الغاليه الى فى البيت يحصلها حاجه!
نفس الكلام فى السوفت وير متجيش تحل مشكله فا تعمل مشكله تانيه وانت بتحل الأولى ! ميبقاش البرودكشن واقع فا عشان تحل الكارثه سريعا تعمل مشاكل تانيه صغيره.
لو لقيت نفسك شغال فى بروجكت فيه مشكله فى ال structure او كود لاموأخذه مش نضيف او حتى مشاكل فى الأدراه وقتها سهل اوى يتسرب لدماغك ان كده كده الدنيا بايظه و انا هعك براحتى ما كده كده عك وسط عك مش هيبان !
بس انا هرجعك لل broken window تعالى نفترض ان فيه عربيه مركونه فى الشارع لمدة اسبوع و بعد اسبوع فى ازاز واحد فيها اتكسر وقتها ايه الى هيحصل ؟ بعد ساعه واحده العربيه هتتفضى تماما من الى جواها !
العكس بقى لو لقيت انك اشتغلت فى بروجكت الدنيا فيها متظبطه كويس من اول ال structure و الديزاين و الكود "النضيف" وقتها انت هتاخد وقت اكبر فى انك تهتم ان كل حاجه تطلع بشكل كويس و انك متعكش حاجه زى بتوع المطافى الى جم يطفوا الحريقه فى الفيلا! حتى لو deadlines او release date انت مش هتبقى حابب انك تبقى اول واحد يعك و ي break the first window !